కణ్ణినుణ్ శిరుత్తాంబు తెలుగు లో అర్థము

 1.అంతు తెలియని మాతృత్వపు భక్తి భావనలో, లీనమయిన ఆ యశోదాదేవి చేత, సన్నని ముడులతో, అల్లిన చిన్న త్రాడుతో, రోటికి కట్టబడిన ఆ శ్రీకృష్ణుడి కంటే, దక్షిణ భారత దేశములో వున్న, కురుకాపురి నగరములోని, విశేష ప్రజ్ఞాశాలి అయిన, నమ్మాళ్వారు అంటేనే, నాకు చాలా ఇష్టము. ఆయన మీద భక్తి భావముతో, ఆయన పేరు పలకాలి, అనే ఆలోచన, నా మదిలో మొదలవగానే, నా మనస్సు సంతోషముతో వువ్విళ్లూరి, నా నోటి నుండి, అమృతము వలె లాలాజలము వూరును. ఆ దేవుడి పేరు పలుకుట కంటే, మా నమ్మాళ్వారు పేరును పలుకుటయే, నాకు చాలా చాలా ఇష్టము.

2. నమ్మాళ్వారుడి వేదాంత ఉపదేశములకు, మనసారా తృప్తి పడి, ఆయన యొక్క భక్తి భావనకు, నేను దాసుడను అయితిని. ఆ దేవుడి గొప్పతనము కంటే, నా గురువుగారి గొప్పదనమే, వెయ్యిరెట్లు ఎక్కువగా, నాకు కనిపించినది. అందుకే, నేను మైమరచి, ఆ నమ్మాళ్వారుడిని కీర్తించి, ఆనందమును పొంది, ఆయన దివ్య పాదములనే, నేను, ఆశ్రయించితిని. విశేష ప్రజ్ఞాశాలి అయిన మా నమ్మాళ్వారు తప్ప, నా కంటికి ఏ దేవుడు కనిపించడం లేదు. అందుకే, నేను దేశ దేశముల తిరుగుతూ, ఆయన ఆ భగవంతుడి గురించి, తెలిపిన ఉపదేశములను, మథురమైన పాటల రూపములో పాడి, ఆయన గొప్పతనమును తెలిపెదను.

3. నేను ఎన్ని దేశములు తిరిగినా, ఎంతమందిని కలిసినా, నా మనస్సులోని ఈ అభిప్రాయము మారదు. చివరకు వైకుంఠములోని ఆ శ్రీమన్నారాయణుడే, లక్ష్మీదేవితో కలిసి, ఎదురైనా సరే, నా దేవుడు ఆ నమ్మాళ్వారుడే. ఆయనకు మాత్రమే, నేను సేవ చేసి, పూజించెదను.

4. చతుర్వేదములు చదివిన పండితులు, నేను దేవుడిని పూజించుట లేదు, అని నన్ను తప్పు పట్టి, నీచముగా, చిన్న చూపు చూస్తున్నారు. అయినా సరే, నాకు వచ్చిన నష్టమేమి లేదు. నాకు తల్లి, తండ్రి, గురువు, దైవము, అన్నీ, నా సర్వస్వమూ అయిన ఆ నమ్మాళ్వారే.

5. నమ్మాళ్వారుడిని కలవక ముందు, నేను దేవుడిని నమ్మి, పూజించాను. అందరి వలె, ఈ ప్రపంచములో వున్న భోగ భాగ్యములతో, సంసారము చేసితిని. కాని, నేను తీర్థయాత్రలు చేస్తూ, రంగు రంగుల బంగారు మేడలు కలిగిన, ఈ కురుకాపురిలో, ప్రకాశవంతముతో వెలిగే, విశేష ప్రజ్ఞాశాలి అయిన ఈ నమ్మాళ్వారుడిని చూసిన తరువాత, నేను, ఈ ప్రపంచములోని అన్నిటిని వదిలి, ఆయనకు భక్తుడను, సేవకుడను అయితిని. అప్పటి నుండి, ఆయన గొప్పతనము తప్ప, నాకు వేరొకటి కనిపించడం లేదు. ఇప్పుడు, నాకు ఈ జన్మ రహస్యము,వేదార్థములు, జన్మ సార్థకత, అన్నీ తెలిసి, చరితార్థుడను అయ్యాను.

6. నేను, నమ్మాళ్వారుడి భక్తుడను, అయినప్పటి నుండి, నా జీవితము వున్నంత వరకు, ఆయనను పూజించి, సేవించే భాగ్యము నాకు లభించినది. నా సర్వస్వమూ ఆయనయే, అని పూజించడం వలన, ఆకాశమును తాకే, పెద్ద పెద్ద మేడలు కలిగిన ఆ కురుకాపురి నగరములోని, విశేషమైన బహుముఖ ప్రజ్ఞాశాలి, ఆ నమ్మాళ్వారుడి అనుగ్రహమును పొందితిని. అందుకే, ఆయన నన్ను, ఎన్నడూ, వదలక, రక్షించును.

7.కురుకాపురి నగరపు రాజు అయిన కారిసూరి పుత్రుడైన నమ్మాళ్వారు, తన దయతో, నా పూర్వ జన్మ పాపకర్మలు అన్నిటిని, పూర్తిగా నాశనము చేసి, నన్ను కరుణించి, తన సుందర దివ్య వేదములు అయిన తిరువాయిమొజి, తిరువాశిరియము, తిరువిరుత్తము, పెరియ తిరువందాది గ్రంథములను నాకు అనుగ్రహించి, అప్పగించిరి. అమృతముతో సమానమైన ఈ సుందర ద్రవిడ వేదములను, నేను ఎనిమిది దిక్కులలోని ప్రజలకు, అర్థమయ్యేటట్లు, రమ్యముగా వినిపిస్తాను.

8. అతి కష్టమైన వేదముల యొక్క అర్థమును, అందరికి సులభముగా, అర్థమయ్యేటట్లు, మథురమైన పలుకులతో, అపరిమితమైన ఆర్తి నిండిన, భక్తి పారవశ్యముతో, నమ్మాళ్వారు ద్రవిడ భాషలో, వేయి పాటలను పాడి, వినిపించారు. ఆ భగవంతుడి కరుణాకటాక్షముల గురించి, ఆ భగవంతుడిని చేరే మోక్ష మార్గము గురించి, ఇంత సులభముగా చెప్పిన పాటలు, ఈ లోకములో, మరి ఎక్కడా లేవు.

9. ఆ దేవుడి సేవలో, ఆ నమ్మాళ్వారు లీనమయి, తనను తాను మరచిపోయి, ఆ దేవుడిని కీర్తిస్తూ, ఎన్ని జన్మలు తపస్సు చేసినా కూడా తెలుసుకోలేని, అద్భుతమైన వేదార్థ రహస్యములను తెలుసుకొని, ఎవరో తెలియని నన్ను, పూర్తిగా నమ్మి, నా మనస్సులో వాటిని నింపిరి. అందుకు ప్రతిఫలముగా, నా జీవితమంతా, ఆయనకు సేవ చేయడం తప్ప, నేను, ఏమీ చెయ్యలేను.

10. ఈ సంసారమును, నా భార్యాపిల్లలను వదిలిపెట్టినందుకు, మరియు ఆ దేవుడిని పూజించని కర్మఫలమునకు, ఎటువంటి పాపఫలితము వచ్చినా కాని, నాకు బ్రతుకు తెరువు అనుకూలించక పోయినా సరే, వేదార్థ రహస్యములను తెలుసుకున్న నేను, స్వామీ, నన్ను నమ్మి, ఇంత భాగ్యమును అనుగ్రహించిన, మీ దివ్య పాదపద్మములకు నిండుగా, సేవ చేసే భాగ్యమును ప్రసాదించుము, అని, కోకిలలు మైమరపుతో గొంతెత్తి తియ్యగా పాడే, పరిమళ పూతోటలు కలిగిన కురుకాపురిలోని, విశేష ప్రజ్ఞాశాలి, ఆ నమ్మాళ్వారుడిని వేడుకొన్న నేను ఆ భాగ్యమును పొందితిని.

11. దక్షిణ భారత దేశములోని కురుకాపురి నగరములో నివసించు అపరిమితమైన ప్రతిభాశాలి, వేదాంతవేత్త, బహుముఖ ప్రజ్ఞాశాలి అయిన నమ్మాళ్వారుడికి, ఆ దేవుడిని పూజించే మానవులంటే, చాలా ఇష్టము. అటువంటి, ఆ నమ్మాళ్వారుడికి భక్తుడైన మథురకవి ఆళ్వారు, అంతులేని భక్తి పారవశ్యముతో పాడిన ఈ పాశురములను ఇష్టముగా చదివిన వారు, మరణించిన తరువాత ఆ వైకుంఠమునకు చేరగలరు.

***********

కణ్ణినుణ్ శిరుత్తాంబు సమాప్తం

మథురకవి ఆళ్వారుడి దివ్య పాదములకు నమస్కారములు.